འཁོར་བའི་སྐྱོ་གར།

༼ནང་ཆེན།༽　མེ་ཆར།

《 海南报-藏文 》（ 2024年09月04日 第 04 版 ）

ལོ་ཟླ་ཆུ་བོ་བཞིན་རྒྱང་དུ་བཞུད་ཅིང་།།

ཞེན་ཆགས་ཁ་བ་བཞིན་ཕྱོགས་བཞིར་སྤུར་སོང་།།

ལང་ཚོ་འཇའ་ཚོན་བཞིན་དབྱིངས་སུ་ཡལ་ཏེ།།

མི་ཚེ་རྨི་ལམ་བཞིན་སྐད་ཅིག་ཚར་སོང་།།

འཇིག་རྟེན་འཁོར་བ་འདི་སྡུག་གི་བཙོན་ར།།

འདིར་སྣང་ཞེན་པ་འདི་ལན་ཚྭའི་ཆུ་བོ།།

མི་ཚོགས་ཟང་ཟིང་གི་འདུ་འཛིའི་ཀློང་ནས།།

སྐྱིད་སྡུག་སྣ་ཚོགས་འདི་འཁོར་བའི་ཆོས་ཉིད།།

བདེ་སྡུག་མི་ཚེ་ཡི་བགྲོད་ལམ་རིང་མོར།།

མི་སེམས་གཉོམ་པོ་འདི་རླུང་གིས་ཁྱེར་ཏེ།།

དགའ་སྡུག་མི་ཚེ་འདི་ཁངས་ཆར་འདྲེས་མ།།

འཇིག་རྟེན་འཁོར་བ་འདི་སྟོན་གྱི་ནམ་ཟླ།།

དྲན་པའི་གཞུ་མོ་དེ་ནང་དུ་བཀུག་དུས།།

ཀུན་རྟོག་རྒྱ་མཚོ་ཡི་རླབས་རིས་མཐའ་ལ།།

སྣང་བ་མག་མོག་གི་ཟློས་གར་འཁྲབ་དུས།།

འདས་སོང་ལོ་ཟླ་དེ་ཡིད་ངོར་གཟན་པ།།

རེ་བའི་ཐང་ཆེན་གྱི་ལྗོན་ཤིང་རྩེ་ལ།།

སྙན་ཚིག་ཁྲི་འབུམ་གྱི་མེ་ཏོག་བཞད་དུས།།

ཐ་སྙད་གསོན་པོ་འགས་རྣམ་ཤེས་ཀློག་བཞིན།།

ཤོག་ངོ་སྟོང་པ་རུ་རི་མོ་ཕབ་ཡོད།།

རེ་སྐྱོ་རེ་སྨྲེང་གི་འཇིག་རྟེན་སྐྱ་བོ།།

རེ་དགའ་རེ་སྡུག་གི་མི་སེམས་གཉོམ་པོ།།

འཚོ་བའི་ཁ་དོག་འདི་ཨ་ཁྲ་བ་ཁྲ།།

ཚོར་བ་སྙི་མོ་འདི་མངར་སྐྱུར་ཁ་གསུམ།།

ཞེ་རྩ་སྨྲེང་ས་དེ་འཁོར་བའི་གྲོང་རེད།།

དགའ་སྐྱོ་རེས་མོས་འདི་འཁོར་བའི་གཤིས་རེད།།

སོང་སོང་ལོ་ཟླ་འདི་འཁོར་བའི་སྒྲུང་རེད།།

འཇིག་རྟེན་སྣང་བ་འདི་ཆུ་ཟླའི་རོལ་གར།།