མི་ཚེའི་དགའི་སྐྱོ།
ཁྲ་ཁྲ་འཇིག་རྟེན་ཁམས་ཀྱི་རུ་གྲོང་དེ་ཉུལ་དུས།།དགའ་སྐྱོ་མི་ཚེའི་ཟློས་གར་ཡིད་ངོ་རུ་འཆར་ཚེ།།མངར་སྐྱུར་འཚོ་བའི་གཏམ་རྒྱུད་སྨྱུག་རྩེ་རུ་དྲངས་ནས།།འདས་སོང་ལོ་ཟླའི་ཟིན་ཐོ་ཤོག་ངོ་རུ་བཀོད་འདོད།།རེ་བའི་སྣེ་ལ་རེ་བའི་སྣེ་མོ་རེ་མཐུད་ཅིང་།།མི་ཚེ་ལོ་ཟླ་རིང་མོ་ཕར་ཕར་ལ་ཡལ་ཡང་།།འདས་མ་ད་གསུམ་དོན་ལ་སྟོང་འདང་རེ་བརྒྱབ་ན།།བདེ་སྡུག་འཚོ་བ་དབྱངས་ཀྱི་ང་རོ་ལ་བརྒྱུས་འདོད།།ཐུང་ཐུང་མི་ཚེ་འདི་ནི་སྐད་ཅིག་གི་རྨི་ལམ།།སྲིད་པའི་གྲོང་ལ་འཚོ་བའི་ཁ་དོག་དེ་བྲིས་ཤིང་།།འདིར་སྣང་ལས་ཀྱི་ངག་རྒྱུན་མ་ཆད་ཀྱི་བར་དུ།།མི་ཚེ་དབྱངས་ལ་བསྟིམས་ནས་ཕྱིར་དྲན་ཞིག་བྱ་འདོད།།ཀྱག་ཀྱོག་ལམ་འཕྲང་བརྒལ་ནས་ན་ཚོད་དེ་སྨིན་ཞིང་།།དགའ་སྐྱོའི་བག་ཆགས་རིང་མོ་ཉིན་མཚན་དུ་འཐེན་གྱིན།།རྟོག་ཚོར་གྱ་གྱུའི་རྦ་རླབས་གཙང་བོ་རུ་འདྲེས་དུས།།དགའ་སྡུག་འཚོ་བའི་རི་མོ་པིར་རྩེ་ནས་འདྲེན་འདོད།།མི་ཚེའི་འགྲུལ་བཞུད་རིང་མོའི་ཐེམ་སྐས་དེ་བརྒལ་དུས།།དགའ་སྐྱོའི་སྣང་བ་དབྱངས་ཀྱི་ཀློང་རིམ་ནས་འཐོར་ལ།།ལོ་རྒྱུས་གླེགས་བམ་བརྩེགས་པའི་གཏམ་རྒྱུད་ཀྱི་ཁྲོད་ནས།།འདི་ལྟར་རྒྱང་ནས་རྒྱང་མཇལ་ལན་གསུམ་དུ་བྱས་ཡོད།།ནམ་ཟླ་དུས་ཀྱི་འཁོར་ལོ་སྡོད་མེད་དུ་འཁོར་ཞིང་།།ཐུང་ཐུང་མི་ཚེའི་རྨི་ལམ་སྐད་ཅིག་གིས་ཡོལ་དུས།།དུས་ཀྱི་བར་མཚམས་རེ་ནས་སྨྲེང་གླུ་རེ་ལེན་པ།།ཁོ་མོའི་དྲན་རྟོག་ཚོར་བ་དངོས་མ་དེ་ཡིན་སྐད།།མི་ཚེ་ཀྱ་ཀྱོག་མང་པོའི་འགྱུར་ཁུགས་དང་འགྲོགས་ཤིང་།།མི་རྟག་དུས་བཞི་ནམ་ཟླའི་རི་མོ་དང་མཉམ་དུ།།ཚེ་སྲོག་རེ་ལ་གྱེས་འཕྲད་དགའ་སྐྱོ་ཡིས་གྲུབ་པ།།ཀྱེ་མ་མི་ཚེའི་ཟློས་གར་སྐད་ཅིག་གི་གློག་འགྱུ།།ཤོག་དཀར་ངོས་སུ་མི་ཚེའི་ཐ་སྙད་དེ་འབྲི་དོན།།དགའ་སྐྱོ་འདྲེས་མའི་ཚིག་ཚོགས་འདི་ག་རུ་བཤམས་དོན།།ནང་སེམས་ཚོར་བའི་རི་མོ་དབྱངས་རིང་ལ་བརྒྱུས་དོན།།ཕལ་བའི་སེམས་ཀྱི་དབྱངས་རྟ་སོ་མ་དེ་ལགས་སོ།།
