ལསསྐལསཕོངསཔའིབྱམསཔ
དུས་ཀྱི་འགྱུར་བག་རྒོད་པོའི་བར་གླགས་ནས།།བདག་རང་གཏད་སོའི་མདའ་མོ་ཕོག་པ་གང་།།གཙང་བོའི་རླབས་དང་འགྲོགས་ནས་ནང་སེམས་སུ།།བརྩེ་བའི་མེ་དྲོད་བཞིན་དུ་ཁད་ཀྱིས་འཁྱིལ།།ཨ་ཧོ་སྙིང་དུ་སྡུག་པའི་བུ་མོ་ཡ།།སྤྲིན་གྱི་ཐོར་ཅོག་འཆང་བའི་ཁྱོད་ཀྱིས་ནི།།སྒེག་པའི་ཉམས་དང་བཅས་ཏེ་ཚུར་འོངས་ཏེ།།བདག་གི་གློ་སྙིང་གང་ཞིག་འཁྲུགས་པར་བྱེད།།སྙིང་གི་རུས་པ་གཅོག་པའི་བཞིན་བཟང་མ།།ཁོ་བོ་ཁྱོད་ཀྱི་པར་སྟེང་གཟབ་ནན་གྱིས།།ཅེར་དྲགས་མིག་གི་མཐོང་ལམ་ཀུན་ཏུ་ཡང་།།ཁྱོད་ཀྱི་གཟུགས་བརྙན་ལས་གཞན་མ་མཆིས་སྐད།།སྲོད་ཀྱི་དུས་ཚོད་མང་ཤོས་རྒྱང་རིང་གི།།ཁྱོད་རང་གནས་སའི་ཕྱོགས་ལ་བལྟས་ཏེ་ནི།།ཡིད་དུ་སིམ་པའི་ཞལ་རས་སྒོམ་པའི་ཁར།།ནམ་ཞིག་འཛོམས་པའི་དུས་ལ་ཚོད་བགམ་གནང་།།ཁྱོད་ཀྱིས་སྔར་བཞིན་མི་སྨྲའི་བརྟུལ་ཞུགས་ཚུལ།།བཟུང་ཡང་བདག་ཡིད་སྤང་གི་མེ་ཏོག་སྟེ།།ལས་འཕྲོའི་ངང་ཆུང་འཕུར་སའི་མཚོ་འདབས་ཀྱི།།འཁོར་བའི་ཐང་ཆེན་བརྒལ་བའི་ལྷ་མོ་ཉིད།།ཡིན་ཡང་ལས་སྐལ་འདི་ཉིད་འཇའ་ཚོན་བཞིན།།མི་རྟག་སྐད་ཅིག་ཉིད་དུ་ཡལ་སོང་སྐད།།བདག་གི་ཕྱི་ནང་གསང་གསུམ་ཆར་ཆུ་ཡིས།།བཀྲུས་ཀྱང་སྔར་བཞིན་ཧ་ཅང་གདུང་བས་གཙེས། །ལས་ཀྱི་གཟེབ་ཏུ་ཚུད་པའི་བདག་གིས་ནི།།མ་རངས་སྡུག་པའི་ཚུལ་ལ་བཟོད་བསྲན་གྱིས།།སྨྲེང་བའི་ཡིག་འབྲུ་རླུང་ལ་བརྡར་ཏེ་ནི།།ཞི་བའི་གཞས་ཤིག་ཅིས་ཀྱང་གཏོང་དགོས་སྙམ།།དེ་ནི་སུས་ཀྱང་བཤད་ཚོད་མི་འདུག་སྟེ།།མི་རྟག་ལས་ཀྱིས་བཀོད་པ་ཡིན་ལགས་པས།།རིགས་དྲུག་མ་ལུས་འཁོར་བའི་སྲིད་གསུམ་དུ།།མ་འཕྲད་པ་ནས་གྱེས་གྲབས་བགྱི་འདི་སྨྲེང་།།ཀྱེ་ཧུད་གདུགས་ཆེན་ལས་ཀྱི་མཐུ་འོག་ནས།།འཕྲད་པའི་ལས་སྐལ་དབེན་པའི་ཁོ་བོ་གཉིས།།ཁ་པར་ནང་གི་གཟུགས་རྣམས་དཔེར་བྱས་ཏེ།།སོ་སོའི་སྙིང་གི་འཕར་སྒྲ་དྲངས་ཏེ་ལུས།།དེའི་ཚེ་གཏན་དུ་ལས་འཕྲོ་ཟད་པ་ཡི།།གུས་པོར་ཁྱོད་ལ་ཞེན་པའི་གདུང་བའི་ནང་།།ཧ་ཅང་སྡུག་པའི་ཉམས་ཀྱིས་འཚོ་དགོས་ཀྱང་།།བསོད་བདེ་ཆེ་སོང་སྙམ་ལས་འགྱོད་གདུང་ཅི།།
