སྟོན་ཁའི་སོ་ནམ་པ།

ཨ་བཙུན་གཡུང་དྲུང་བཀྲ་ཤིས།༼དཀར་མཛེས།༽

《 海南报-藏文 》（ 2025年09月30日 第 04 版 ）

སྤྲིན་བྲལ་སྟོན་མཚན་མཁའ་དབུས་སུ།།

ཉ་རྒྱས་སྒེག་མོའི་བྱད་བཞིན་ལས།།

ཟུར་མིག་འོད་ཀྱི་འདབ་ལྡན་མཚོན།།

འབྲས་ལྡན་འབེན་གྱི་ཐིག་ལེ་ལ།།

མི་བཟད་ཅི་ཡང་རེག་པའི་མཐུས།།

ནོར་འཛིན་སྐྱེངས་པའི་བཞིན་རས་ཀྱིས།།

འཆར་ཁའི་མདངས་ཀྱང་དམན་སར་འགོད།།

སོ་ནམ་མིག་གི་ཆུ་གཏེར་ཆེར།།

ཞིང་བཟང་སྙེ་མའི་རླབས་ཀྱི་ཕྲེང་།།

ཡིད་ཀྱི་བྲག་ལྡེབས་རེག་པ་ཡིས།།

དགའ་བདེའི་ཟེགས་མའི་སྦྲང་ཆར་འཛིན།།

ཐང་གཤོངས་གཤིན་ས་འཛིན་མའི་གཞིར།།

འགྲོ་རྣམས་འདུ་འགོད་འཁྲུག་པ་ནི།།

གྲོག་ཚང་གོར་མའི་སྒོ་མོ་ཉིད།།

ཧར་གྱིས་ཡར་ལ་བཏེགས་དང་མཚུངས།།

འབྲུ་རྣམས་མཛོད་དུ་སྐྱེལ་བའི་ངལ།།

ཁུར་ལྕི་བཟོད་པའི་ལུས་ཅན་རྣམས།།

འགྲོ་འོང་གོམ་པའི་རྡོག་སྒྲ་ཡིས།།

ནོར་འཛིན་རྣ་བའི་བུ་གར་གཏོར།།

འབད་སྩོལ་མཁའ་ཡི་ཁང་བཟང་དུ།།

ཕྱི་བཤོལ་སྤྲིན་གྱིས་མ་བཟུང་བས།།

ལོ་ལེགས་ཉ་རྒྱས་འོད་དཀར་འཆང་།།

བདག་པོའི་གན་མཛོད་རྒྱ་མཚོ་རུ།།

ནས་ཀྱི་ལང་ཚོའི་མཆོར་སྒེག་རྫོགས།།

རོང་པའི་རོ་འཛིན་དགའ་བྱེད་པའི།།

སྦྲང་དཀར་རྩམ་པའི་རོ་བཅུད་གང་།།

དུས་བཞིར་སྤྱོད་པའི་དཔལ་བརྟས་པས།།

ངལ་བའི་འབྲས་ཀྱི་དགའ་སྟོན་རྫོགས།།