འཆར་ཡན་བྱེའུའི་གཤོག་རླབས།

ཀྱེ་ཕུར་མཆོག་གསུམ།༼　མཚོ་ལྷོ༽

《 海南报-藏文 》（ 2025年09月30日 第 04 版 ）

ངལ་བ་མཚོ་མོའི་གཏིང་སར་ཡན་ཡན་ནས།

སྐྱིད་སྣང་གཡོར་གྲུའི་ཁ་ཕྱོགས་བརྗེད་དེ་ཐལ།

འཁོར་བ་ལ་མོའི་ཉིན་སྲིབ་འགྲིམས་འགྲིམས་ནས།

བག་ཡངས་སེམས་པའི་ནམ་མཁའ་བསྒྲིབས་ཏེ་ཐལ།

གཅིག་གཅིག་ཚིག་གིས་མནན་པའི་ཡིད་ཀྱི་གཏམ།

གཉིས་གཉིས་གལ་བོ་ཆེ་ཡི་ལུགས་ཀྱིས་འཆད།

གསུམ་གསུམ་བདེན་པའི་སྙིང་པོ་མདོར་དྲིལ་ན།

བཞི་བཞི་གནད་ཀྱི་རིལ་བུ་སོ་ཡིས་འཆའ།

ཆར་བ་མེད་པའི་སྨུག་པ་འཁྱམ་པོ་ཞིག།

དྲན་པའི་ནམ་མཁར་ཐོལ་གྱིས་ལྡིང་ནས་ཐོན།

རླུང་གི་གཤོག་པ་ཐོགས་པའི་བྱ་རྒྱལ་གྱིས།

སྨུག་པའི་རི་སུལ་གཏོར་ནས་ཉི་ཟེར་འཐུ།

ཞོགས་པའི་ཟེར་མས་བལྡགས་པའི་བ་མོའི་ཆུ།

ལྗོན་ཤིང་ཕྲ་མོ་རེ་རེ་རྣམ་ཤེས་ལ།

ག་ལེར་འཐིམ་པས་དཔྱིད་ཀྱི་བུ་མོ་ལ།

ལང་ཚོ་གཞན་ཞིག་རྒྱས་པ་གསང་བའི་གནས།

ཟུར་མིག་འཕྲད་པའི་བྱ་བརྒྱ་ནགས་མ་རུ།

འཁོར་ནས་སྒྲོ་ཡག་རྩེད་མོའི་དཔལ་ལ་རོལ།

སང་ཞོགས་འཕུར་ལམ་གཅིག་མིན་མི་ཤེས་ཀྱང་།

དེ་རིང་སེམས་པའི་མངའ་ཐང་དགོད་སྒྲས་བསུ།

འབུ་ལ་རན་པའི་ལྗོན་པའི་ཡལ་ག་རུ།

མངོན་ཆུང་འཛུམ་བག་སྦས་པའི་ལོ་མའི་ཚོགས།

མི་འགྱང་སླེབ་ལ་ཉེ་བའི་དབྱར་གྱི་དཔལ།

བསུ་བའི་སྟ་གོན་རྩོམ་པ་ཡིན་ནམ་ཅི།

བསིལ་རླུང་འཇམ་པོའི་ཕྱག་གི་བྱིལ་བྱིལ་གྱིས།

སྟོར་རམ་སྙམ་པའི་ཆར་སིམ་ཐིགས་པ་འགའ།

སྐྲ་ལོའི་གསེབ་ཏུ་འཐོར་བས་རེ་བཞག་གི།

རྟ་ཕོར་བཅིབས་ཏེ་མདུན་ལ་བང་གིས་རྒྱུགས།

སུ་ལ་ཤོད་ཐབས་མེད་པའི་སྐད་ཆའི་མདའ།

ཡིད་ལ་སྦས་པས་སྣོད་ཀྱི་ཁ་ཞབས་བརྡོལ།

ལྗང་མདོག་བྲལ་བའི་དབྱར་གྱི་ཁ་དོག་གིས།

ང་ལ་ཅི་ཞིག་འཆད་དམ་དཔལ་མོ་ལགས།

མདུན་ལ་ཆས་འདོད་ལྷམ་ཐིག་དམ་དུ་བསྡམས།

འབྱུང་བཞིར་གནོད་པ་མེད་པའི་ལྭ་ཞིག་གྱོན།

ལམ་གྱི་ཁ་ཞེང་དོག་པའི་ཐེ་ཚོམ་གྱིས།

ཡིད་ཀྱི་རྒྱུ་མར་སྐད་ཅིག་དགུ་མདུད་ཐེབས།