སེམས་འགྱུ་ཐོར་བུ།

འཇོ་མདའ་པདྨ།༼ཆབ་མདོ།༽

《 海南报-藏文 》（ 2025年09月24日 第 04 版 ）

རྟོག་པའི་རླབས་ལ་རྩེན་ཏེ།།

འཚོ་བའི་རི་ལུང་ཉུལ་དུས།།

གཞོན་ཆུང་ཡིད་ཀྱི་མེ་ཏོག།

རྒས་འགྲོ་བསམ་པ་མི་འདུག།

སྙིང་གི་ལྗང་ཆུང་ལོ་མ།།

ལོ་ཟླའི་རླུང་གིས་མ་ཁྱེར།།

ལྡེམ་ལྡེམ་ལུས་ཀྱི་ནེམ་ཤ།

འཁོར་བའི་གྲོང་ནས་ངོམ་སོང་།།

མི་ཚེའི་དར་རྒུད་རི་མོ།།

སེམས་ཀྱི་མཐིལ་དུ་ལྷུང་དུས།།

འཁོར་བའི་དཀའ་སྡུག་ཟེར་བ།།

འཁུར་ལ་ངལ་བ་མི་འདུག།

ཀུན་རྟོག་འཚོ་བའི་ཆར་ཆུ།།

ནང་སེམས་སྤང་དུ་འཐིམ་ན།།

སྒྱུ་འཕྲུལ་ཡིག་འབྲུ་བརྒྱ་སྟོང་།།

སོར་མོའི་རྩེ་ནས་འཁྲུངས་ངེས།།

ཚོར་བའི་རྟ་ཕོར་ཞོན་ནས།།

སྣང་བའི་འཇིག་རྟེན་འགྲིམ་པའི།།

སྨྱུག་ཐོགས་གཞོན་པའི་ལས་ལ།།

ཡིད་ཀྱི་གཏིང་ནས་སྨོན་སོང་།།

ལས་འཕྲོའི་ཚིག་གི་ཟླ་ཟེར།།

མགྲིན་པའི་གསེང་དུ་འཐོར་ན།།

ཁེར་རྐྱང་འགྲུལ་བཞུད་འདི་ལ།།

སྐྱིད་སྣང་གཞན་ཞིག་ཡོད་འདྲ།།