ཁྱོད་ལ་ཕྱོགས་པའི་སེམས་པ།

གློག་འོད།༼དཀར་མཛེས།༽

《 海南报-藏文 》（ 2025年09月24日 第 04 版 ）

བཅུ་དྲུག་ལང་ཚོའི་མེ་ཏོག་དར་ཚད་ཅིག།

མ་བཅོས་གཞོན་པའི་སྣང་བ་ཟབ་མོ་རུ།།

ཡུད་ཙམ་འཕྲད་པའི་ཞེན་ཆགས་རི་མོ་འདི།།

སེམས་ཀྱི་རྡོ་རིང་བྲིས་པ་ཡལ་བ་མེད།།

ལས་ཀྱི་བཀོད་པ་འདི་ཡི་ཐུ་འོག་ནས།།

མཛའ་བརྩེ་ཡིད་ཀྱི་ཨ་ལོང་དམ་དུ་སྦྲེལ།།

སྙིང་ཤ་དམར་པོའི་ཚབ་ཀྱི་གཏམ་གཞི་ལ།།

མི་ཤིགས་དབུ་མནའ་ལྕི་མོའི་རྒྱབ་གནོན་རླིང་།།

འཇིག་རྟེན་སྣང་བ་འདི་ཡི་ཐང་སྟེང་ན།།

འདང་བརྩེའི་འོ་ཆུ་མངར་མོ་གཅིག་ཏུ་འདྲེས།།

སྙིང་གཏམ་གཙང་པོའི་རྒྱུན་བཟང་བར་མེད་བཞུར།།

སེམས་འཕྲིན་མེ་ཏོག་དཀར་པོ་ཁྱོད་ལ་བསྲིངས།།

དཀར་མཛེས་འོ་མའི་མདངས་ཀྱི་ཞལ་ངོ་ལ།།

དྭངས་གསལ་སྤྱན་མིག་ཁྲ་བོ་འཁྱུག་འཁྱུག་གཡོ།།

དམར་པོའི་མཆུ་སྒྲོས་ལྷུག་ལྷུག་གྲོལ་བ་ཡིས།།

མ་བཅོས་འཛུམ་ཆུང་བཞད་པ་སྙིང་དུ་སྡུག།

ནག་ཅིང་སྣུམ་པོའི་སྐྲ་ལོ་འོད་ཀྱུག་ཀྱུག།

བསིལ་བྱེད་རླུང་བུས་ཡང་ཡང་ཤད་པ་ཡིས།།

བསུང་ཞིམ་དྲི་མ་རེ་རེ་སྙིང་ལ་སིམ།།

བརྩེ་བའི་ཟུངས་ཁྲག་ཁོལ་མ་རླབས་ལྟར་བསྒྱུར།།

དུང་སེམས་མེ་ལྕེ་འབར་བའི་ལོ་ཟླ་དེར།།

མི་ཁའི་རླུང་བུའི་ཁྲོད་ན་མཉམ་དུ་འགྲེང་།།

མཚན་ཞག་གང་བོར་གསང་གཏམ་རེས་མོས་སྦྲེལ།།

གཞོན་པའི་ལོ་ཟླ་འདི་ནས་དལ་གྱིས་བསྐྱལ།།

ཤིང་སྡོང་གཡུ་ལོ་འབར་བའི་རང་བྱུང་ཚལ།།

གཅིག་པུ་གོམ་ཁ་བསྒྱུར་ལ་ཉུལ་བའི་དུས།།

སྔོན་སོང་ལོ་ཟླའི་བར་གྱི་གསང་བ་རེ།།

སེམས་ཀྱི་མེ་ལོང་ངོས་སུ་གསལ་ལམ་ལམ།།

འཚོ་བའི་ལམ་བུ་མི་གཅིག་གཉིས་སུ་ཕྱེ།།

ནང་གི་འདོད་ཞེན་དེ་ཡང་མི་མཐུན་པས།།

འདྲིས་འདྲིས་ཆུང་གྲོགས་སེམས་ཀྱི་བུ་མོ་དང་།།

མི་བཟོད་མཐའ་མར་རང་རང་སོ་སོར་གྱེས།།

འཁྲུལ་སྣང་རྨི་ལམ་ཙམ་གྱི་གར་སྟེགས་འདིར།།

ལན་གཅིག་མཇལ་བའི་བག་ཆགས་ཟབ་མོ་དེས།།

ཚོར་རྟོག་རྦ་རླབས་གཡོ་བའི་གྲུ་ཁ་ནས།།

ཡང་ཡང་དྲན་པར་འཆར་བ་འགོག་ཏུ་མེད།།

ཁོང་ན་དྲག་ཏུ་འབར་བའི་ཆགས་སེམས་ཀྱིས།།

དེང་གི་མི་ཡིས་བསླུ་བྲིད་མདུང་ཐུང་གིས།།

རང་གི་ཚེ་ཡི་རོགས་ལའང་བསྣུན་པའི་དུས།།

གཤིས་བཟང་བུ་མོའི་རྣམ་པ་ལྷག་ཏུ་དྲན།།

དམར་ཆུང་སེམས་ཀྱི་བར་ཐག་ཤིན་ཏུ་ཉེ།།

དུང་བའི་རྒྱུད་སྐུད་ཕྲ་མོ་དེ་བས་འཐས།།

མ་བསམ་ལས་ཀྱི་ལམ་བུ་ཁ་ཁ་ཡིས།།

མི་འགྱུར་སེམས་ཀྱི་མདུད་པ་དལ་གྱིས་གྲོལ།།

ལས་ཀྱི་བཀོད་སྒྲིག་ཟེར་ན་འདི་ལགས་ཏེ།།

ཅི་ཙམ་མཐུན་པོར་བྱུང་ཡང་མཐའ་མར་བྲལ།།

དྲན་གདུང་ཡིད་ཀྱི་ཁུར་པོ་དེ་འདྲུད་བཞིན།།

རྒྱང་ལ་འཁྲེང་བའི་སེམས་ཀྱི་རྨ་ཁ་ལྕི།།

མཁའ་མཐར་སྨིན་དྲུག་ཁྲ་མོ་རིམ་གྱིས་འདུས།།

དཀར་གསལ་ཟླ་བའི་ཞལ་རས་དེ་མཐོང་ཚེ།།

ཁྱོད་མེད་ཁེར་རྐྱང་མཚོ་བའི་ལས་དབང་འདི།།

དྲན་ན་ཞེ་སྣང་སྐྱོ་བ་རྫོགས་མཐའ་མེད།།

སེམས་འགྱུ་རླུང་གིས་བསྐྱོད་པ་མ་ལགས་ཏེ།།

མཇལ་འཛོམས་རེ་བའི་ཉི་མ་དལ་གྱིས་ནུབ།།

གདུང་སེམས་གནོན་ཐབས་བྲལ་བའི་ཚོར་རྟོག་གིས།།

དྲན་སྣང་རོལ་དབྱངས་སྐྱོ་བས་འཐེན་དགོས་བྱུང་།།

གང་ཁྱོད་སྐྱིད་ཅིང་བདེ་བར་འཁོད་པས་ན།།

རེ་བ་གཞན་ཞིག་བདག་ལ་སྟོངས་གྱུར་པས།།

མི་ཚེའི་བཞུད་ལམ་རིང་མོའི་ཁུག་ཀྱོག་ནས།།

འཚོ་བའི་འདུན་མར་འོད་ཀྱིས་འཁྱུད་པར་སྨོན།།

འདུ་འབྲལ་སྒྱུ་མའི་ཟློས་གར་ལན་གཅིག་ལ།།

དུང་སེམས་གཉོམ་པོའི་སྨྱུག་རྩེ་དྲང་མོ་ཡིས།།

སྐྱིད་ལ་སྡུག་གི་ཚོར་བའི་གཏམ་རིང་འདི།།

བཅོས་མིན་ཤོག་དཀར་ངོས་སུ་འཁྱུག་ཙམ་ལགས།།