དེ་རིང་སྔ་དྲོ་ངས་འཕྲུལ་རྟ་ཞིག་གཡར་ནས་དམིགས་ཡུལ་མེད་པར་ལམ་ལ་ཆས། ས་ཆེན་ཡོངས་ལ་ཚ་བའི་མེ་ལྕེ་ལྷོག་ལྷོག་གིས་འབར་ཞིང་གནག་ཅིང་སྣུམ་པའི་ལམ་ནི་ཟད་མཐའ་མེད་པའི་བྱང་ཐང་ཆེན་མོ་ཞིག་དང་འདྲ།རྣམ་ཀུན་ངའི་ཡིད་ལ་འཕྲུལ་རྟ་ཞེས་པའི་ཚིག་འབྲུ་འདི་གཉིས་འཁོར་ན་ཞེ་ལོག་བྱུང་ཞིང་།སུན་སྣང་འགོག་མེད་ཅིག་ཀྱང་ཡོང་།ཡིན་ན་ཡང་།འཚོ་བའི་ཁྲོད་ནས་འཕྲུལ་རྟ་ཞེས་པའི་བཅའ་དངོས་འདི་བེད་མ་སྤྱད་དེ་ལྷག་སོང་བའི་དུས་ནི་མེད་པ་ལྟར་ཆགས་ཡོད།ད་ཆ་འཕྲུལ་རྟ་ཞོན་ཐེངས་རེ་ལ་ཕྱིར་དྲན་ཞིག་འགོག་མེད་དུ་ངའི་ཡིད་ལ་འཆར་དུ་འཇུག་འོང་།

ལོ་ཚིགས་དང་ངའི་ན་ཚོད་སོགས་ག་ཙམ་ཡིན་པ་མི་དྲན་མོད། ངས་འཕྲུལ་རིགས་ཤིག་ཐོག་མར་ཡིད་ལ་ཐོག་པ་ནི་ལྕགས་རྟ་ཡིན།རིམ་བཞིན་ན་ཚོད་ལོན་པ་ན།ངས་ཨ་ཞང་ལ་འཕྲུལ་རྟ་ཞིག་དགོས་ཞེས་རེ་བ་བཏོན། སྔོན་ཆད་འཕྲུལ་རྟ་ནི་ངའི་རྨི་ལམ་ནང་གི་རྟ་མཆོག་ཏུ་རློམ་ཞིང་།ཨ་ཞང་ཡུལ་ལ་ལོག་ཐེངས་རེ་ལ།ང་ལ་འཕྲུལ་རྟ་ཉོས་ཡོད་ཅེས་པའི་ཚིག་ལ་རབ་ཏུ་རེ་བ་ཡིན།ཨ་ཞང་ཡུལ་ལ་མ་ལོག་སྔོན་ནས་ངའི་སེམས་སུ་འཁྲུལ་སྣང་གི་སྒོ་མོ་ཕྱེ་ཞིང་།ཐང་ཆེན་ཞིག་ལ་འཕྲུལ་རྟ་ཞོན་ཞིང་རྫི་གླུ་ལེན་པའི་རྣམ་པ་ཡིད་ལ་བཅངས།རི་མཐོན་པོ་ཞིག་གི་སྐེད་ལ་འཕྲུལ་རྟ་ཞོན་ཏེ་རི་དྭགས་ཀྱི་རྗེས་གཅོད་ཀྱིན་པའི་རབ་བཏགས་ཀྱི་མེ་ཏོག་ཀྱང་རབ་ཏུ་འཐུ་མྱོང་།དང་ཐོག་ངས་འཕྲུལ་རྟ་ལ་མོ་ཐོར་འབོད་ཅིང་རིམ་བཞིན་ཞང་བོའི་ངག་ནས་འཕྲུལ་རྟ་ཞེས་པའི་ཚིག་འབྲུ་ཚོར། སྐབས་ཤིག་ལ་ཞང་བོས་ང་ལ་འཕྲུལ་རྟ་ཞིག་ཉོ་དགོས་པ་སྡེ་བ་གོང་འོག་ཀུན་ནས་ཤེས།ཞང་བོ་ངེད་གཉིས་ཀྱི་བར་ལ་ཡང་རྒྱུན་ལྡན་གྱི་སྐད་ཆ་ཞིག་ཏུ་ཆགས་སོང་།

དོན་རྐྱེན་ནི་འབྱུང་སླ་ཞིང་།ཕུགས་བསམ་ནི་འགྲུབ་དཀའ།ཟེར་བ་ཅི་མ་བདེན།ལོ་ཞིག་གི་དགུན་ཁར།ཞང་བོས་འཕྲུལ་རྟ་ཞོན་ཏེ་ཡུལ་ལ་ལོག་པའི་ལམ་བར་དུ་རྒྱབ་ཕྱོགས་ནས་གཡག་མགོ་རྟགས་ཅན་གྱི་རླངས་འཁོར་ཞིག་གློ་བུར་དུ་མཆོང་ནས་ཞང་བོ་དང་འཕྲུལ་རྟ་གཉིས་ས་ལ་བརྫིས།ཉིན་དེ་ནས་བཟུང་ང་ལ་འཕྲུལ་རྟ་དགོས་ཞེས་འབོད་སའི་ཡུལ་མེད་ཅིང་།ཨ་ཞང་ཞེས་ངའི་རེ་བ་རུམ་ལ་འཛིན་མཁན་ཞིག་ཀྱང་མེད་སོང་།

ད་ལྟ་ང་ཚོའི་ཕ་ཡུལ་ནས་རུ་བ་འབྲོག་ས་དང་དགུན་ས་གང་ལ་ཆས་དགོས་ཀྱང་།འཕྲུལ་རྟ་རྐྱང་བས་བཅའ་ལག་དག་སྐྱེལ་འདྲེན་བྱེད།རྟ་ནོར་ལ་དཀའ་ལས་མེད་ཅིང་འབྲོག་པར་སྟབས་བདེའི་རང་བཞིན་དུ་གྱུར། ཡིན་ཡང་ཉིན་རྒྱུན་འབྱུང་དང་འབྱུང་འགྱུར་གྱི་ཆག་སྒོ་ཡང་གྲངས་ཀྱིས་མི་ཟིན་ནོ།

ད་ཆ་ངའི་དམིགས་ཡུལ་མེད་པའི་འགྲུལ་བཞུད་ཀྱང་གང་ཞིག་ལ་ཐོན་ལ་ཉེ།ངས་རང་གི་

པར་ལེན་པ།གདུགས་དཀར།མགོ་ལ་རེག་ཙམ་བྱེད་དུས་ད་གཟོད་འཕྲུལ་ཞྭ་གྱོན་འདུག་པ་ཚོར་བྱུང་།ངའི་ཞང་བོས་ཀྱང་ཉིན་དེར་འཕྲུལ་ཞྭ་གྱོན་ཡོད་ཅིང་།འཕྲུལ་ཞྭའི་རྒྱབ་ཏུ་གཅན་གཟན་གསའ་ཡི་གཟུགས་རིས་ཤིག་ཀྱང་ཡོད་པ་དྲན།འཕྲུལ་ཞྭ་ཇི་ལྟར་གྱོན་ཡོད་པ་དང་འདོགས་ཐག་ལུགས་མཐུན་དུ་བྱས་ཡོད་མེད་ནི་དྲན་ངོགས་སུ་མི་འདུགད་ལྟ་ང་ཉི་ནུབ་ལ་ཕྱོགས་ནས་འགྲོ་བཞིན་ཡོད། ལོ་དེའི་དགུན་ཁར་གྲང་ངར་ཆེ་ཞིང་ལམ་ན་རྡུལ་སྐྱ་ཡང་བར་མེད་དུ་འཚུབ་གྱིན་འདུགཞང་བོས་མིག་གཉིས་འབྱེད་ཙམ་འབྱེད་ཙམ་བྱེད་ཅིང་།འཕྲུལ་ཞྭའི་སྲུང་ཤེལ་གདོང་ལ་འཐེན་ཏེ། མུ་མཐུད་དུ་མདུན་ལ་ཆས། བར་སྐབས་ཤིག་ལ་འཕྲུལ་ཞྭའི་སྲུང་ཤེལ་ངོས་སུ་ཁ་རླངས་འཐིལ་ཞིང་རབ་རིབ་ཏུ་གྱུར། འཕྲུལ་རྟ་ཇེ་དལ་དུ་བཏང་ནས་ལག་གཡོན་པས་སྲུང་ཤེལ་ངོས་སུ་བྱིལ་བྱིལ་ཐེངས་འགའ་བཏང་། གང་ཞིག་ལ་འཐེན་འདུག་པའི་ལམ་ལ་མུ་མཐུད་དུ་ཆས།སྐབས་ཤིག་ལ་རྒྱབ་ཕྱོགས་ནས་འུར་སྒྲ་ཞིག་མཆེད། ཉམས་འཇོག་གང་ཡང་མ་བྱས་པར་རང་ལམ་ལ་མུ་མཐུད་དུ་སོང་།འུར་སྒྲ་སྔར་ལས་ཆེ་ཞིང་སྲུང་ཤེལ་ངོས་ཡོངས་རབ་རིབ་མག་མོག་ཏུ་གྱུར།ད་གཟོད་ཞང་བོས་རང་ཉིད་ཐང་ལ་འགྱེལ་འདུག་པ་ཚོར།ངའི་སེམས་སུ་སྐྲག་སྣང་ཞིག་གློ་བུར་དུ་འོང་སྟེ།འཕྲུལ་རྟའི་མྱུར་ཚད་དལ་བ་དལ་བུར་མི་གཏོང་ག་མེད་ཀྱི་ཚོར་བ་ཞིག་རུས་པའི་རྐང་ལ་འཁྲུངས།རྣམ་ཀུན་ང་ལ་ཕྱིར་དྲན་སློང་བའི་ཚོར་བ་ཡང་དེ་མ་ཡིན་ནམ།