ཕྱི་རོལ་གྱི་གཡའ་དག་པའི་ནམ་མཁའ་དང་དྲོད་འཇམ་གྱི་རླུང་བུ་དེ་དག་གིས།སོས་ཁའི་གནམ་གཤིས་ནི་བྱིས་པ་ཆུང་ཆུང་ཞིག་གི་ངོ་གདོང་ཇི་བཞིན་འཇམ་ཤ་ལྡན་ཞིང་མཉེན་ལྕུག་ལྡན་པ་ཞིག་ཡིན་པའི་ཚོར་སྣང་སྟེར།བསིལ་འཇམ་གྱི་རླུང་བུ་ཤིག་ཤིག་ཏུ་ལྡང་བ་དང་མཉམ་དུ།ལྗོན་པའི་ཡལ་གའི་སྟེང་དུ་ཁྲ་ལམ་མེར་བཞད་པའི་མེ་ཏོག་དེ་དག་ཀྱང་ཕར་གཡོ་ཚུར་གཡོ་བྱེད་བཞིན་འཛུམ་པའི་ཞལ་རས་ངོམ་པ་ནི་ཅི་འདྲའི་ཉམས་དགའ་བ་ཞིག་མ་རེད་དམ།

ལྗོན་པའི་ཡལ་གའི་སྟེང་ན་ཅི་དགར་རྩེན་པོའི་བྱེའུ་ཆུང་ཆུང་དག་གིས་ཀྱང་སྐད་སྙན་མོ་སྒྲོག་གིན་འཕུར་ལྡིང་ཡང་ཡང་བྱེད་ཅིང་།སྐབས་རེར་ས་ལ་བབས་ནས་རྒུམ་བུ་འཚོལ་བའི་སྣང་ཚུལ་ནི་ཅི་འདྲའི་ཉམས་དགའ་བ་ཞིག་མ་རེད་ཨང་།ལྗོན་པ་དང་ཐག་ཉེར་ལྷུང་ལྷུང་དུ་བཞུར་བཞིན་པའི་ཆུ་བོ་དེ་ནི་སྐད་ཅིག་ཙམ་ལའང་མི་སྡོད་པར་མདུན་ནས་མདུན་དུ་བསྐྱོད་པ་ནི།སེམས་ལྡན་ཀུན་ལ་སྒྱིད་ལུག་དང་ལེ་ལོ་དོར་ནས་མདུན་དུ་བསྐྱོད་དགོས་པའི་དྲན་གསོ་གཏོང་བཞིན་པ་དང་འདྲ།

ང་རང་གྲོང་ཁྱེར་འདིའི་ཁང་རྩེག་མཐོན་པོ་ཞིག་གི་སྒེའུ་ཁུང་ཁར་ལངས་ནས་ཕྱི་རོལ་གྱི་ཡོད་ཚད་ལ་མིག་བཤེར་རྒྱག་དུས།ཕྱི་རོལ་གྱི་བྱ་དངོས་ཐམས་ཅད་ནི་དེ་འདྲའི་གསོན་ཉམས་ལྡན་ཞིང་ནང་སེམས་ལ་སྣང་ཚོར་འདྲ་མིན་སྩོལ་ཡོང་བ་ཞིག་རེད་ཨང་།

༢

ཕྱི་རོལ་གྱི་མུན་པ་ཇེ་སྟུག་ཏུ་སོང་བ་དང་མཉམ་དུ།གཞུང་ལམ་གཡས་གཡོན་གྱི་གློག་སྒྲོན་དག་འོད་ཆེམ་མེར་འཕྲོས་ཡོང་བ་དང་།གྲོང་ཁྱེར་འདི་འཇིག་རྟེན་གསར་པ་ཞིག་ཏུ་གྱུར་སོང་བའི་སྣང་བ་སྟེར་ཅིང་།འཇིག་རྟེན་གསར་པ་དེ་ནི་མཛེས་སྡུག་གི་རི་མོ་ཞིག་དང་འདྲ་བར་ངའི་མཛེས་དཔྱོད་ཀྱི་ལྟ་བ་ལ་ཚོད་བགམ་ཡང་ཡང་བྱེད་ཡོང་བས།ང་རང་ཡང་མཛེས་སྡུག་དེའི་ཀློང་དུ་འཁྱམ་སྟེ་རྣམ་ཤེས་ལ་རང་དབང་མི་ཐུབ་པར་གྱུར།

དུས་ཚོད་ཀྱི་མདའ་རྩེ་ཕར་ཕར་ཕྱིན་པ་དང་།ཕྱི་རོལ་གྱི་གློག་སྒྲོན་འོག་གི་ལམ་འགྲོ་བ་དག་ཀྱང་རིམ་བཞིན་ཇེ་ཉུང་དུ་སོང་སྟེ།གྲོང་ཁྱེར་འདིའི་ཉིན་གཅིག་གི་ལས་དོན་ཐམས་ཅད་རྫོགས་སོང་བ་ལྟར་ཡོད་ཚད་ཁུ་སིམ་མེར་གྱུར།དེ་ལྟ་ནའང།སྒེའུ་ཁུང་ཕྱི་རོལ་གྱི་ལྗོན་པ་དང་དེའི་ཡལ་འདབ་དག་ནི་སྔར་བཞིན་རང་གི་འདོད་མོས་ལྟར་འཚོ་ཞིང་གནས།ཉིན་གཅིག་གི་བྲེལ་འཚུབ་རྫོགས་ནས་འཇིག་རྟེན་ལྷིང་འཇགས་སུ་གྱུར་བའི་དུས་འདི་ནི།ནང་སེམས་ལ་བྱབས་ཁྲུས་བྱེད་པའི་དུས་བཟང་ཞིག་ཡིན་པས།ངས་སྒེའུ་ཁུང་གི་ཕྱི་རོལ་ལ་མིག་ཟུང་ཅེར་ནས་ལྗོན་པ་དེ་དང་དེ་འབྲེལ་གྱི་གནད་དོན་གང་མང་ཞིག་ལ་མནོ་བསམ་གཏོང་བཞིན་ཡུན་རིང་ལུས།

༣

སྐབས་རེར།དུས་ཚོད་ཀྱི་གོམ་ཁ་ལྷོད་ལ་མངགས་ཏེ་ཕྱི་རོལ་གྱི་གནམ་གཤིས་འགྱུར་ལྡོག་དང་བྱ་དངོས་གྱི་འཕེལ་འགྲིབ་རྣམས་མིག་གིས་འཚོས་ཤིང་སེམས་ཀྱིས་མྱངས་ན།འཇིག་རྟེན་གྱི་གནས་ལུགས་མང་པོ་ཞིག་ངང་ངམ་ཤུགས་ཀྱིས་རྟོགས་ཡོང་ཞིང་།མི་དང་ཕྱི་རོལ་འཇིག་རྟེན་གྱི་འབྲེལ་བ་དང་།ཕྱི་རོལ་འཇིག་རྟེན་གྱི་བྱ་དངོས་དག་གིས་མི་ལ་བསྩལ་བའི་ནུས་སྟོབས་སོགས་ནི་གསང་བའི་ཚུལ་དུ་གནས་ཡོད་པའང་ཤེས་ཡོང་།