- 放大
- 缩小
- 默认
མོ་སྟོན་ཕག་མགོ
༼དཀར་མཛེས།༽ གླག་ཀུན་བཟང་བསོད་ནམས།
《 海南报-藏文 》（ 2024年07月17日 第 04 版 ）
ཞི་བདེ་ཉི་མ་ལགས་ཀྱིས་གཙོ་འཁྲབ་བྱས་པའི་མུ་འབྲེལ་ཟློས་གར༼མོ་སྟོན་ཕག་མགོ༽ལ་བསྐྱར་ལྟ་བྱས་པ།
སྙེ་མའི་མགོ་ལྕོག་ལྡེམ་པའི་ཞིང་གྲོང་ཞིག་ཏུ།།སྒྲོལ་མའི་སྒོ་དར་སྐྱ་བོ་རླུང་གིས་བསྐྱོད་ཅིང་།།ཡུང་མའི་ཕྲེང་རྒྱན་དཔྱངས་སའི་གྱང་ཁང་ཆུང་ཆུང་།།ཨ་ཁུ་ཕག་ལོ་ཚང་གི་ཁྱིམ་གཞིས་ཡིན་འདུག།ཁྲི་གདུགས་ཉི་མའི་འོད་ཟེར་དྲོད་ཀྱི་ཐིག་ལེ།སྐར་ཁུང་གྲུ་བཞི་བརྒྱུད་ནས་ཁྱིམ་ལ་འཕྲོས་ཏེ།སློག་པ་སྐྱ་རལ་ཁུད་དུ་ཡུན་རིང་བཞུགས་ཀྱང་།།ཕག་ལོ་གཉིད་ལས་སད་པའི་ཐབས་ཀྱིས་སྟོངས་འདུག།ལྟོགས་པའི་ཕེ་སྐད་སྐྱོ་མོ་ལྟོ་བས་བཏབ་སྟེ།།བཙན་གྱིས་མལ་ལས་མ་ལང་ཐབས་མེད་ཡིན་དུས།།ཆུང་མས་དཀའ་བས་བསགས་པའི་འབྲི་མར་ས་ེ་ར་པོ།།སྣུམ་པོའི་ཟས་ལ་རྔམ་པའི་ཕག་ལོས་ཟོས་སོང་།།ཁ་ལ་ཅི་ཡོང་བལྟ་ཞེས་གྲོང་ཉུལ་སོང་རྗེས།།སྒྲོལ་མ་མ་བུ་གཉིས་ཀས་གནའ་སྒྲུང་བཤད་བཞིན།།མུན་ནག་མཚན་གྱི་དཀྱིལ་བར་རེ་ཞིང་བསྒུགས་མོད།ཆང་སྐྱོན་རྡོག་ཐོའི་ཕ་འབབ་ཕག་ལོས་ཁྱེར་བྱུང་།།ཉིན་མོར་ཕག་པ་ནང་བཞིན་མལ་དུ་ཉལ་ཞིང་།།མཚན་མོར་སྨྱོན་པ་ནང་བཞིན་ཆང་སྐྱོན་འཕུད་ཅེས།།མི་ཁ་རླུང་གིས་ཁུར་ནས་རི་ཆུ་བརྒལ་ཡང་།།ཨ་ཁུ་ཕག་ལོའི་སྤྱོད་པར་འགྱུར་ལྡོག་མི་འདུག།རྒ་རྒས་མ་ཎི་བགྲང་སའི་དུང་འཁོར་རྩ་རུ།།འབྲོང་དང་དྲེད་མོང་བསད་པའི་གཏམ་རྒྱུད་བཤད་ནས།།ཁ་ཕོ་གནམ་ལ་ཐུག་པའི་གཞོན་སྐྱེས་ཕག་ལོར།།ཐ་ན་ཁ་ལ་འཐེན་རྒྱུའི་དུ་བ་མི་འདུག།སོ་ནམ་ལས་ལ་བརྩོན་ཞིང་ཁྱོ་རྩིས་ཆེ་བའི།།མ་བཟང་ཆུང་མ་སྒྲོལ་མའི་ཐབས་ལ་བརྟེན་ནས།།ཕག་ལོས་ས་སྟོང་ཞིག་ནས་འབྲི་མར་རྙེད་པར།།ཁྱུང་གི་སྒོ་ང་རྙེད་ཅེས་གཉིད་ཀྱང་མ་ཁུག།ཕག་ལོ་སྒྱིད་ལུག་གཉིད་ལས་གཏན་དུ་སད་དེ།།རི་དྭགས་རྔོན་ལ་ཆས་པའི་ལམ་ལ་ཞུགས་ཁར།།མ་བཟང་སྒྲོལ་མ་མ་བུས་སེམས་པ་དགའ་བཞིན།མིག་ཆུ་དྲོན་མོ་ཞིག་གིས་སྐྱེལ་མ་བྱས་འདུག།རྟ་རྒན་རྐྱང་ལི་ཞོན་ཞིང་ཤྭ་ཁྱི་ཁྲིད་ནས།།ཉག་ཕྲན་མདའ་དང་གཞུ་མོ་ལག་ཏུ་ཐོགས་པའི།།ཕག་ལོ་རྔོན་ལ་འགྲོ་བའི་རྒྱབ་གཟུགས་དེ་ལ།།ཚ་ཞང་འདན་མ་བྱང་ཁྲའི་ཉམས་ཤིག་དོད་འདུག།ཚེར་མའི་སྡོང་པོ་ཞིག་གི་ཕག་ཏུ་ཡིབ་སྟེ།།རི་བོང་ནག་པོ་ཞིག་ལ་མདའ་མོས་བརྒྱབ་རྗེས།།དགའ་ཚོར་དཔག་མེད་ངང་ནས་གམ་དུ་བརྒྱུགས་ཚེ།།རྡོ་བ་ནག་པོ་ཞིག་ལས་ཅི་ཡང་མི་འདུག།ཝ་མོ་འཕྱི་ཁུང་ནང་དུ་བྲོས་པ་མཐོང་རྗེས།།ཞྭ་མོས་འཕྱི་ཁུང་བཀག་པའི་ཇུས་ཆེན་བཀོད་ཀྱང་།།ཕྱིང་ཞྭ་ཝ་མོས་གོན་ནས་རྒྱང་ལ་བྲོས་ཏེ།།ཕག་ལོའི་རྟ་ཁྱི་མདའ་གསུམ་རྗེས་སུ་ཤོར་སོང་།།ཝ་མོ་ཞྭ་གོན་ཞིག་དང་རྟ་ཁྲིད་ཁྱི་ཞིག།རྟ་ཕོ་མདའ་ཁུར་ཞིག་ཅེས་གང་སར་དྲིས་ཀྱང་།།སུས་ཀྱང་མཐོང་ཐོས་མེད་པའི་ངོ་མཚར་དོན་འདི།།འཛམ་གླིང་གསང་ཆེན་ཞིག་གི་གྲབས་སུ་རྩི་འོས།།མི་ཡུལ་ས་མཐའ་ཞིག་ནས་ཡོད་ཚད་བོར་ཞིང་།།ཐ་ན་ལུས་ཀྱི་གོས་ཀྱང་གཞན་གྱིས་འཕྲོག་ནས།།མི་མང་རུབ་རྡུང་རག་པའི་ཁེར་རྐྱང་ཕག་ལོས།།བུ་དང་ཆུང་མ་དྲན་པའི་མིག་ཆུ་ཤོར་རམ།།རླུང་ཁའི་གྲི་སོ་རྣོ་བའི་བྱང་ཐང་ཞིག་ཏུ།།ནོར་དང་ལུག་ཁྱུ་འཚོ་བའི་བྱིས་པ་ཞིག་གི།རུམ་གྱི་བྲོ་ཁར་མུག་ནས་མཆིལ་མ་ཤོར་དུས།།ཕག་ལོའི་ལ་རྒྱའི་ཀ་བ་ས་ལ་འགྱེལ་འདྲ།།ས་མཐའི་ཁེར་རྐྱང་འཁྱམས་པོ་ལྟོགས་ཤིང་འཁྱགས་ཏེ།།གནས་ཚང་གཡར་མཁན་ཞིག་ཀྱང་ལར་ནས་མེད་པར།།སྒོ་ཁའི་རྩྭ་སྤུངས་ཤིག་ཏུ་ཉལ་དགོས་ཐུག་དུས།།ཕག་པ་ནག་པོ་རེས་ཀྱང་སྙིང་རླུང་དཀྲུགས་འདུག།ལམ་འགྲོ་མེད་དུས་ཤིག་ལ་ལམ་འགྲོ་བརྒྱུགས་ཏེ།།ཕྱུག་ཆེན་དཔོན་གྱི་ལྕམ་མོའི་བླ་གཡུ་བོར་ཞིང་།།།གཡོག་མོས་ལྕི་བར་བསྐུངས་ཏེ་གྱང་ལ་སྦྱར་བ།།རྩྭ་སྤུངས་གསའ་གསེང་ཞིག་ནས་ཕག་ལོས་མཐོང་འདུག།མོ་པ་ང་ཡིན་ཟེར་ནས་ཤོབ་སྐད་བཏང་ཞིང་།།མཆོད་ཆ་ཕག་མགོ་དགོས་ཞེས་བཀའ་གསུང་གནང་སྟེ།།གྱང་ངོས་བླ་གཡུ་ལྗང་རིལ་མངོན་ལ་ཕུད་པས།།མོ་སྟོན་ཕག་མགོའི་མཚན་སྙན་དེ་ནས་འབར་འདུག།ཨ་ཁུ་མོ་སྟོན་ཕག་མགོའི་མངོན་མཁྱེན་ནུས་པས།།རྒྱལ་སྲས་སེམས་ནད་དཀྲུགས་པའི་གདོན་འདྲེ་བཏུལ་ཞིང་།།རྐུན་མ་ཁྱི་སྐྱག་སྤུན་གྱི་རྐུན་རྐུབ་ཕུད་པས།།སྙན་པའི་འབྲུག་སྒྲ་ཆེན་པོ་གླིང་ལ་གྲགས་འདུག།མོ་པས་དཀོར་དུ་གསོལ་བའི་རྒྱུ་དང་ནོར་གྱིས།།ཆུང་མས་ཝ་ཞྭ་གྱོན་འདོད་ཕུགས་བསམ་བསྐུངས་ཤིང་།།ཁྱིམ་ལ་རིན་ཆེན་དོ་རྩིག་མཐོན་པོར་བརྩིགས་ཀྱང་།།ཨ་ཁུ་མོ་སྟོན་ཕག་མགོའི་མགུ་ཁ་མ་སོད།།ཨ་ཁུ་མོ་པ་ཚང་ལ་མགྲོན་པོ་མང་དྲགས།།ཞིང་གྲོང་རྐང་ལམ་ཕྲ་མོ་ཇེ་ཟབ་ཆགས་འདུག།དད་པའི་གུས་ཕྱག་འཚལ་མཁན་མང་མང་ཡིན་དྲགས།།མོ་པས་རང་ཉིད་ལ་ཡང་ཡིད་ཆེས་བཙན་འདུག།ལྕགས་མཚོའི་བུ་ཆུང་ཚེ་རིང་རི་ཁར་ཤི་ཞེས།།མོ་པའི་མོ་ལུང་ལྟར་དུ་ཤི་ཆོས་སྒྲུབ་སྐབས།།ཚེ་རིང་གླུ་ཆུང་ལེན་བཞིན་ཡུལ་ལ་སླེབས་པས།།ཨ་ཁུ་མོ་སྟོན་ཕག་མགོའི་རྫུན་རྐུབ་བརྡོལ་འདུག།ཕག་ལོའི་སྐྱག་རྫུན་རྔ་མ་དོང་ཁར་བུད་པས།།ཡུལ་མིའི་རྡུང་ནན་ཁྲོད་ནས་ཁྲེལ་གྱིས་མ་བཟོད།།རྗེས་སུ་མོ་རྫུན་མི་འདེབས་ཁོ་ཐག་ཡིན་ཞེས།།ཕག་མགོ་ནག་པོ་དེ་ཡང་ཆུ་ལ་གཡུགས་འདུག།མོ་པའི་རྫུན་རྐུབ་བརྡོལ་བའི་མི་ཁ་གཏམ་འཁྱར།།རྐུན་མ་ཁྱི་སྐྱག་རྣ་རུ་རླུང་ལྟར་གཡུག་དུས།།དམྱལ་བར་ལྷུང་རྒྱུ་དེ་ཞེས་དམོད་མོ་བོར་རམ།།ཀྱི་ཧུད་རིན་ཆེན་གསེར་ཞེས་འགྱོད་པ་སྐྱེས་སམ།།རྒྱ་བླ་བོད་བླ་མང་བའི་དེང་གི་དུས་ལ།།རྗེ་བཙུན་མི་ལ་ལྟ་བུ་དཀོན་ཞིང་དཀོན་ཡང་།།མོ་སྟོན་ཕག་མགོ་དག་གིས་ས་ཆེན་བཀང་འདུག།རྐུན་མ་ཁྱི་སྐྱག་དག་གིས་གཟབ་གཟབ་མཛོད་ཅིག།